كنت ماشى فى الشارع الساعه 3 الصبح رايح البيت ولسا خارج من القهوه اللى اصبحت الملجأ الرئيسى ليا أنا وأصحابى وخاصة فى الجو ده ............. المهم وأنا ماشى قابلت الدكتور عتريس وهو دكتور مسالك بوليه ومحدش يفهمنى غلط وعنده 32 سنه وفى الوقت ده بليل أوى كده كان واقف على باب صيدلية والدته وتقريبا بيقفلها ........... رحت سلمت عليه ولقيتوا بيقول لى ادخل وبعدها قفل الصيدليه واحنا جوه لوحدنا وبرده محدش يفهمنى غلط ... المهم دخلت وقعدنا مع بعض نتكلم وكان هذا جزءا كبيرا من الحديث
قبل ما قول اللى تقال بينى وبينه .......... أحب أوضح ان الراجل ده عنده 32 سنه ومن أشطر الناس فى دفعته ووالده عنده صيدليه وكمان والدته عندها صيدليه ...... يعنى واحده له والتانيه لأخوه الصغيرالصيدلى واللى اتجوز
كان هو قاعد على المكتب وانا امامه وطول الحديث كانت ايديه جوه الدرج ................. والمهم اتكلمنا كتييير وشربنا شاى وفجأه لقيتوا بيقول لى أمال ايه أخبار الحريم فى الجامعه عندك ...؟
اتحرجت ومش عشان انا مؤدب والكلام ده ....... لأ ...... لأنى بصراحه ما توقعتش ان الشخص ده بالذات يسأل السؤال ده ...... المهم رديت انا بقى بصياعه وقلت شكلك بدور على عروسه ... وعايز تتجوز ....؟
وياريتنى ما قلت .... أنا نطقتها ولقيتوا انطلق يضحك وكأنه فى مسرح لعادل امام ورد بعدها وقال انت بتقول ايه ؟
قلت قصدى نفرح بيك بقى .....وعاد يضحك حتى لاحظ أننى بدأت أغضب فقال معلش يامصطفى بس والله مش قادر امسك نفسى ...... وطبعا رديت أنا بقى وقلت مش أخوك الصغير متجوز برده ...؟
ردوهو يضحك قائلا اه ...... لأ ولسا من أسبوعين جايب واد ....... بدأت بصراحه أتعصب فقمت أمشى ...... المهم انه قام ورايه ومسك فيا وقال بالحرف الواحد اسمع بس ..... استنى بس خلاص والله
قعدت وبدأهو يتكلم وقال
تعرف يامصطفى أنا عندى 32 سنه ...... خلصت كلية طب وأنا عندى 24 سنه وبعد كده امتياز ثم تكليف وبقيت 26 سنه وفجأه لقيت الجيش وجب لكن أبويا ربنا يخليه ليا استخدم الكوسه مع عمى اللواء والحمد لله ما دخلتش واخدت اعفاء .................. قلت كويس أفكر بقى فى مستقبلى وأبدأ أحضر ماجستير وأدور على واحده بنت حلال أتجوزها ...... وده طبعا كان رأى أبويا قبل ما يعرف انى بقبض 174 جنيه وأنا راجل دكتور ومش محتاج أقول رأيه بعد ما عرف مرتبى ......
المهم باظ موضوع الجواز وبدأت أحضر ماجستير ومش هاتكلم كتيييير فى النفخ اللى كنت باتنفخه وأنا بأتنقل فى عيادات الأساتذه الكبار بليل بعد المرضى طبعا عشان بس يبص كده فى اللى أنا كاتبه ويقول لأ مش أد كده ..... ولو عيدته كتييير يبص لى وأصعب عليه فيقول خلاص مش بطال .................. المهم بدون رغى كتييير يامصطفى أنا من يومين نجحت والحمد لله بقيت أخصائى مسالك ............ وعندى 32 سنه وعالحديده ........ بس خلى بالك انا بقيت أخصائى بعد 6 سنين وكمان 11 ألف جنيه هدايا للدكاتره
سيبك بقى من كل ده مرتبى بقى دلوقتى أوعى وشك 245 جنيه ............... عارف بعمل بيهم ايه ولو انى لسا ما قبضتش ......... باشرب بيهم حشيش ودلوقتى بس طلع ايده من الدرج وحط السيجاره الملفوفه فى بقه وولعها وخد نفث وراح معاها وطبعا أنا فى ذهول فبص وقال ايه عمرك ماشفت حد بيشرب حشيش قبل كده ولا ايه .....؟
رديت وقلت طبعا شفت وكتييير ....... بس انت أخر واحد أتخيل انه يشرب حشيش ........... طبعا هو نفض لى وكمل كلامه وقال ها ايه رأيك بقى دلوقتى تجوزنى أختك .......... أظن أنا مركز يعنى راجل دكتور ومرتبى 245 جنيه ....؟
طبعا مارديتش فكمل هو
قوم يامصطفى روح بيتك وروح الصبح كليتك واحلم بالبنت بتاعتك وعيش حياتك معاهاوأول ماتتخرجوا نفضوا لبعض وبعدها تعالى بقى هنا جنبى اقبض 245 جنيه وهات بيهم حشيش ولما تعوز تتجوز وتتزنق أوى .......... تعالى وأنا أجوزك لمدة ليله واحده وبس ومن غير شبكه ولا مهلر ولا أى حاجه .... هما 100 جنيه وبس .
قمت وسيبته يكمل تهيس وقبل ما أخرج قلت له وأنا مخنوق طاب أنت عايز ايه .............. شايف المفروض تعمل ايه ياعنى تفضل كده ......؟
رد بكل بساطه لأ طبعا ما أنا خلاص بأدور على عروسه بس تكون صيدليه عشان تشتغل الصبح هنا فى الصيدليه دى وأنا أكمل بليل وده طبعا جنب مرتبى ونعيش بقى زينا زى 76 مليون اللى عايشين
وبس .......... مشيت طبعا وأنا مكتئب ومستنى كده كام يوم عشان ربنا يفرجها عليا وأنسى وما تبقاش نهايته هيا نهايتى .......... يارب
36 comments:
مش عارف يا مصطفي اقولك ايه , لما واحد اهله طلع عينهم عشان يدرس في كلية زي ما بيقولوا كده من كليات القمة ويطلع عينه كمان كام سنة بعد الكلية وياخد المرتب ده في الاخر وتكون دي حياته اكيد يبقي في حاجة غلط , مابلاها التعليم ووجع الدماغ
المشكلة ان الخكومة هنا هارفة كل الكلام ده بس بتستعبط زي ما بيقولوا ومفروض احنا نستني ميت سنة لغاية لما يحسنوا الاوضاع ..
تقبل مروري
للأسف دى الحقيقة ..الدكتور عتريس نموذج لمعظم دكاترة طب وصيدلة فى بهية
لكن شعار "الحشيش هو الحل" مش حل
بداية قوية لمدونتك الواقعية
ربنا يوفقك
مش عارفة بصراحة
ده حال كل الشباب
يا أما مش لاقي شغل .. يا بتشتغل شغلانة ملهاش دعوة بدراستك ومرتبك في النهاية ملاليم
والمفروض أن تجيب شقة وتجهزها علشان تتجوز وتفتح بيت
ده غير بقى مصاريف الحياة والأسعار كل يوم في زيادة
دكتور عتريس من شباب الجيل بس هو اتعذب زيادة علشان كان في كلمية عملية
أنا مش عايزة أحبطك بس ده الواقع
ولو مكنش أهلك مرتاحين ماديا وهيساعدوك علشان تتجوز أو يدفعوا لك فلوس على سبيل الرشوة علشان تشتغل في حتة كويسة يبقى أستعد للقادم
هذا هو الحال في بهية
تحياتي
ده الواقع يا عزيزى
وعلى فكرة العريس اللى كان متقدملى كان بيقول البلد مليانة شغل ها
دور بقى
مش بدافع عنة
عامة الحياه مش كده
المهم قبل كل شئ نلاقى نفسنا ونعرف احنا عاوزين ايه
واظن الحشيش مش حل
ده فيه حاجات غلط ياعم فارس مش حاجه واحده
الى مها
أكيد الحشيش مش حل بس طاب ايه الحل ....؟
والله ياهبه المشكله ان كده ولا كده هايقبض 245 جنيه لأن هو ده مرتب الحكومه ...... بس بعد كده بقى هايبقى عنده نفس يكشف على 100 حاله فى اليوم ......... ولو ربنا كان معاه وكشف عليهم ..... وقبض 245 جنيه هايعيش منين
ياسيكو .... انا عارف ان الحشيش مش حل بس لو قلنا ان الراجل ده مش مرتاح ماديا وفقير ...... كان المفروض يعمل ايه بقى ويعيش ازاى .....؟
انا بجد مش عارفة اقول ايه علي البوست دا
انا بجد االموضوع دا يعتبر صدمنياوك انا معاك انه في بطالة وبتاع بس اخر توقعاتي ان الموضوع دا يكون مع دكتور واخصائي كمان
يعني والله حرام عينه وعين اهله اللي طلعت علشان يوصل للمركز دا
وفي الاخر علي 245 جنيه
يعني انا بجد مش عايزة اقول ان الميكانيكي علي كدة احسن بكتير
بس يعني اعتقد انه لو دور في القطاع الخاص هيكون احسن كتير
واكيد الحشيش مش هيكون علاج للضغط اللي هو حاطط نفسه فيه
لن اعلق علي البوست ولكن مدونه عجبتني واسمها جامد جدا
مصطفى انا طبعا مش هدي لصديقك أعذار ولا لأي مخلوق طبعا ممكن نديله أعذار لأفعاله اللي بتغضب ربنا سبحانه وتعالى
بس مش ملاحظ ان صديقك ده معيش نفسه في حاله من المأساه مع اني اظن على عكس الصورة اللي رسمها للكل
شخص زي ما انت بتقول عنده صيدليه سواء كانت ليه او لوادته
ومركزة كويس علميا ومرتبه مش سيء على الرغم انه مش بيفتح بيت على حد قولت الجميع
بس كل ده وعنده قنوط من رحمه ربنا وبيدور على النص الفارغ
يا مصطفى اقسم بعزة الله اني كنت اعرف ربوب اسر كان مرتبهم 85 في الشهر وربي على ما اقول شهيد وكانوا فتحين بيوت وبيراعوا ربنا وبيشكروة عشان يرزقهم الطيب والحلال
يا مصطفى لا أظن ان مثل هذا الشخص يطلق عليه صديق او حتى يصلح لأن يكون رفقه واني احسبك على خير ان شاء الله
اتمنى ان تساعده لاصلاح حاله وما تقولشي ان انت صغير وتقعد تبكي جنبه على مستقبلك اللي في علم المولى
انا مش معصومة من الخطأ ولا انت ولا صديقك
بس اتمنى يا جماعه ان ثقتنا في ربنا تكون اكبر من كدا
والحياه والبيوت مش فلوس اد ما هي مودة ورحمة
وصدقني صورة العريس وشخصيته عند البنت اختلفت دلوقتي
الغالبيه صدقني ان لم يكن الكل بيدور دلوقتي على انسان يراعي ربنا فيها مش اكتر
تحياتي لقلمك واسعدني تواجدي اليوم بين اروقه فكرك
تقبل مروري
لما واحد زي صاحبك يقول كدة امال الغلابه يروحوة يموتوة دة
والدة عندةصيدليه ووالدته يعني عايش
مرتاح عاوز تفهمني ان اهله ميقدروش يجوزوة ربنا مع الغلابه اللي بيملكوة قوت يومهم
تحياتي
والله معاكى حق ياشيري ده أكيد الميكانيكى أحسن منه ... على الأقل ما ضيعش وقته وقعد يذاكر سبع سنين
شكرا لك يامحمد
الى العنقاء والساحره
مبدئيا أنا موافق ان الواد ده اللى هو صاحبى مزودها شويه
بس برده هو مادخلش كلية طب وضيع كل ده من عمره عشان فى الاخر يشتغل فى صيدلية أمه ويبقى زيه زى أى صيدلى مع احترامى لكل الصيادله .... ده هوه حتى لحصل صيدلى ولا دكتور
وبعدين تعالوا نتكلم عن واحد فى نفس ظروفه بس مش مرتاح ماديا .... كانو هيعملوا ايه بقى 245 جنيه دلوقتى
.... استنوا كده أحسبها لكم .....
عارفين يجيبوا كام رغيف عيش بس حاف يعنى
980 رغيف
يبقى المفروض ان خريج طب ده يعمل ايه بقى .......؟
من خلال تجربتى المتواضعة فى الحياة أقدر أقول إن أول غلطة بيعملها أى خريج أو شاب - عموما مش فى حالة صاحبك بالذات- هو إنه يأخذ وضع الانتظار يعنى يقعد يستنى لحد ما تجيله وظيفة وفى أفضل الأحوال قد يسعى للحصول على وظيفة لكنه يرفض المتاح لعدم ملائمته له ويمكن ده بيفكرنا بإعلان الشباب اللى قاعد على القهوة، وفى تصورى إننا رغم رفضنا لمغزى الإعلان وهو : اشتغل أى حاجة على ما تفرج
إلا إنى بارجع تانى لخبرتى المتواضعة عشان أكد لكم إن الفكرة دى مش غلط لو خدناها من منظور تانى: إنى أشتغل أى حاجة عشان أوسع دايرة علاقاتى بالناس
أنا شفت شباب كتير جت له الفرصة صدفة لما عرف ناس جداد وشافوا طاقاته عن قرب من خلال وظيفة مش مناسبة فعلى طول حطوه فى الوظيفة المناسبة
يعنى غلط إنك تتقوقع وتقفل على نفسك باب وتنتظر حتى يموت الحمار
وجدودنا لما زمان قالوا الحركة بركة والرزق يحب الخفية كانوا فى منتهى الحكمة
وسع دائرة معارفك وقابل ناس جداد واثبت نفسك فى شغلة بسيطة بضمير وإرادة
تلاقى أبواب جديدة اتفتحت لك
و............ ليسقط الحشيش
تصدق؟
أنا حزينة قوى
على صاحبك
والله حرام
الله يجازى اللى كانوا السبب
كاميليا
عتريس ده عايز ضرب النار بجد
هوه عاجبه كده
يحمد ربنا وفى ناس ظروفها اسوأ وبتعدى
انا اخويا معندوش نص امكانيات عم عتريس واتجوز وخلف عشان هوه عايز يعمل بيت
خليه يتنيل
هوه اليوم باين من أوله ، قعدت في الشغل مع الناس المتجوزين حواليا لاقيتهم بيشتكوا مر الشكوى من الغلاء والحاجة اللي بتزيد كل أسبوع تقريبا. وبعد كورس الاكتئاب ده. قولت اشوف الناس كاتبة ايه علشان اطلع من المود اقوم مقراش غير القصة الجميلة دي. هوه انا ناقصة اكتئاب يعني. على العموم يا سيدي هوه ده واقع كل الشباب اليومين دول. ده حتى النماذج اللي قدرت بعد تعب وشغل مضني تعمل قرشين تقدر بيهم تتجوز بقوا مش راضين يقولك انا لو اتجوزت هاصرف القريشين وارجع على الحديدة استنى شوية لما يزيدوا شوية ويزيد العمر معاها ولما يجيي يقتنع بالمبلغ اللي معاه يكون فاته القطر.
الحل الوحيد زي ما كنت بقول لواحد صحبي امبارح هوه السرقة بس اللي يقدر يتحمل وزردها دنيا وآخرة.
وسلامي لبهية اللي عاملة فينا كدة.
اولا ازيك يا عم مصطفى واخبارك
ثانيا بص يا سيدى
ده انسان الظروف هى اللى حطته فى الموقف ده وهو استسلم
انا مثلا عندى 25 سنه ونفسي اتجوز
:D
بس مش لاقى عروسه
انا خريج زراعه
بقبض دلوقتى فى الشغلانة بتاعتى 600 جنيه غير بقى المكافآت والحاجات دى
بس لو جيت تبص هتلاقى الحياه بقت صعبه اوى اوى
فى كل حاجه
وبهيه اللى انت مبسوط بيها دلوقتى هى السبب
هتقول ازاى وبتاع هقولك
بهيه بنظام الكوسة فى الكليات وقعت سنه
بهيه فى نظام الكوسة فى الجيش لبست جيش
بهيه فى نظام الكوسه فى الوزارات اشتغلت فى مزرعه بقى سنه وفى الآخر سيبتها هتقول ومالها بهيه فى الموضوع أقولك انهم منعو استيراد البقر وده كان حاجه ممكن تظبطنا كلنا
أما صاحبك اللى عايز يتجوز صيدلانية يبقى خايف من حاجه يا حاج دا بيقولك تشتغل الصبح وهو يكمل بليل
امال هيتقابلو ازاى
فى تبادل الدوريات ولا ايه
وحاجه كمان انا سمعن ان ولاد بهيه بقت 80 مليون مش 76
وشد حيلك يا بلد
salamat
قبل ما امشى
سيبك من الكلام بتاع الراجل ده
واوعى تستسلم
بس هو صدق فى حاجة واحده
وانت فى الكلية حب براحتك وعيش حياتك
اما لما تتخرج فلس يا ابنى واتجوز بقى وعيش
أكنك موجود من جديد
انا معاكى يامها فى انه لازم يوسع دائرة معارفه ويدور على شغل خاص
والله ياكاميليا ... احنا كلنا بندعى عليهم
ربنا يوفق اخوكى يامريم وعقبال عتريس
والله ماكنت اعرف ان الموضوع ده هايزعلك جامد كده يا اميره
اما انت بقى فا هقولك ان البلد كله كوسه لدرجة ان ماماتى مش لاقيه خضار تانى تطبخه ههههههههههههههههههه
ارجو الاهتمام بذلك الموضوع الموجود بالمدونه وارجو التضامن معى وشكرا
مصطفي
ازيك
بجد حاجه تحزن
بس تعرف يا مصطفي مش زميلك بس اللي كده ده فيه ملايين زيه
حاجه تحزن بجد
حسبي الله ونعم الوكيل في اللي وصله شبابنا للمرحله دي من اليأس والأحباط
شباب زي الورد بتموت نفسها بالبطئ في الحشيش والمخدرات علشان تنسي الهم اللي هي فيه
طبعا الهم ده مش مبرر انهم يشربوا حشيش بس لما واحد يقبض 245 جنيه يعمل بيهم ايه والنبي ده لسه واحد زميلي ناوي يتجوز رايح يسأل علي شقه علي قدها ايجار جديد لقي الأيجار 350 جنيه طيب لو واحد كل مرتبه 245 هايعمل ايه علشان يعيش أكيد هايشحت
حسبي الله ونعم الوكيل
تحياتي ليك يا مصطفي وألف تقدير لشخصك الكريم
عادي جداً انا اعرف مستشار بل وقاضي .. قاضي ياقدع في محكمة .. بيحشش وبينام مع حريم وكان بيتصل بيا علشان اجي الفله الحشيش علشان مش بيعرف يلف وقالي لو عايز حريم اجبلك حريم ومش عارف اية واهو قاضي دحنا هنشوف ايام سودة ياقدع
الدنيا لسة هتخرب وهتهخرب اكتر من كدة
دحنا هنشوووووووف ايام
ربنا يهدينا بس
بوست جميل يالحب
تحياتي لك
اللى عاوز بشتغل ويجيب فلوس هيعمل كده
هو كل حاجه نقول الظروف ومش عارف ايه
طب ما انا بنت اهو
وخريجه من كام سنه
وبشتغل فى الحكومه
ماقعتش يعنى جمب 300 جنيه
بشوف شغل تانى وبعمل دراسات عليا
واضح انا صاحبك ده الحشيش لحس دماغه
سيبك منه واوعى تبقا ذيو
اللى عاوز يكون حاجه واللى عاوز يعكل حاجه
هيعملها ياذن الله
رينا يوفقك
ويهدى صحيك
صباحك سكر
ولا زعلانة ولا حاجة ياسي مصطفى. إحنا خلاص اتعودنا على بهية وعمايلها.
الآن وحصريا علي يلا نفضحهم أخطر قضية تعذيب وانتهاك لحقوق الإنسان في مصر الحاج عبد الله يروي قصته http://www.yallanefdahom2.blogspot.com/
بجد يا درش الدكترو ده عايز حد يفوئوا
لان فيه ناس كتير زيه كدا بس مش باليأس ولا الكآبة دى وبعدين ده عنده شيزوفرنيا واضحة ياحج منين متربي ودكتور وليه اهل وجيران محترمه زيكوا وهو تفكيرة ميت كدا
من غير كلام وفذلكة بس انا اعرف ناس كتير اتجوزوا ومرتبهم هما الاتنين حطوه على بعض وصدقنى كتير بيوت مقفولة على اللى جواها وناسها صابرين لان عارفين ان هييجي يوم يتنصفوا وربنا يوسع عليهم وبيسعوا فى الدنيا
وهو يعني عشان 32 سنة يبقى يروح يتحنط
يا مصطفى واضح من بلوجك ومن طريقة عرضك للمواضيع انك اكيد ابعد ماتكون عن الاحساس الميت ده
وان شاء الله ربنا يديك الحب والانسانة التى تكمل معاك على الحلوة والمرة
لان الحاجة الوحيدة اللى تسعد الراجل والبنت انهم يحبوا بعض ويتجوزوا مش علشان العيشة هتبقى بمبى بمبى بس هيبقى فيها اللى يصبرهم على العيش والعيشة واللى عايشنها طول ما هما بيسندوا بعض
اتمنى تزور البلوج بتاعي انا كاتبة عن الموضوع ده اسمه الحب والعيشة وقولى رأيك http://tayer-ya-hawa.blogspot.com
يعني آجي تقوم تقفلها في وشي كده
هي كانت ناقصة إكتئاب
شوف ده بأه واقع و للأسف مش هيتغير و مش هنقدر نغيرة
طب نعمل إيه؟؟
نعمل حيطة
:)
الدكتور صاحبك ده لسع يا حاج من زمان بس احسن حاجه انه استغل المرتب فى حاجه مفيده
بس بيكفى الشهر كله حشيش منين يا معلم ده قرش ونص يخلصوا على المرتب
متفق مع الإخوة فى إن سوء الحال مش مبرر لعمل أى شىء يغضب ربنا , بالعكس دا كده الحال بيسوء زيادة
مشكلة الطبيب مش حصرية عليه للأسف , دى مشكلة جيل كامل , و بتعبر عن الواقع المصرى المؤلم , و الحقيقة ان اللى جاى أسوء
ربنا يفرجها من عنده , و يهدينا للصواب أجمعين
تحياتى
تصدق نكدت عليا
بقي يشرب حشيش قال كان سافر برة احسن
ربنا يستر علينا كلنا
بجد زعلتني على الشباب اللي زي الورد
ربنا ينتقم من اللي كان السبب
تحياتي
مبسوط جدا الحمد لله من التعليقات دى
ووالله عايز ارد بس مش لاقى وقت
ومعلش لان الدراسه بدأت ومزنوق جدا
للاسف ده مش حالة لوحده يا دكتور
ده حال كل المصريين
الراجل اتعلم وطلعت عينه وفى الاخر مرتبه بتقول كام
دول حتى مش يكفوه حشيش لمدة اسبوع
وعظيمة يا مصرررر
يا اللى بتقدرى الرقصات فى شارع الهرم والدكاترة مرتبهم 275 جنيه
بلغ الدكتور صاحبك سلامى وقوله انت من المجاهدين يا على بس تمسك بالصبر وربنا معاك
متزعلش منى يا مصطفى
لا تعليق
لان دا مثال سىء جدا
اوعى تحتذى بيه
تقبل تحيتى
اه
ورد تانى لهبه
طبعا لاء ياهبه
دا مش حال الشباب
يوووه
انا مش عاوز اعلق
مره تانى
مش تزعل منى يامصطفى
احمد سكر
اوع تسمع كلامه....اتجوز وعلى مسئوليتى...هههههه
والله عندك حق... وبكل اسف دى حقيقه
عتريس موجود فى اغلب الجامعات والمستشفيات ..واكتر من كده كمان
دكاتره ملحدين وفاسقين وكذبين
وكفار وحجات تانيه كتير وماخفيا كان اعظم
لكن الغيبوبه والتغيب والتخدير عمره ماكان حل
الحل ان الكل يفوق ويركز جدا علشان يطلع جيل كاره النوع القديم ويقدم نوع جديد محترم
البوست بتاعك واقعى جدا
وجميل انك رصدت الظاهره وسجلتها
تحياتى
ههههههههههه
انتوا بتتكلمو فى ربع جنية مخروم
ههههههههههههههههههه
هو لسة فى ناس كدة
ههههههههههههههههههه
ماهو دا حالنا
بس لازم ييجي يوم
ابيض علي كل مظلوم لون البالطو يعني
واسود علي كل ظالم
تحياتي
ومساااااااااء الخيرررررررر
أصل انا بتخيل اني بحشش
ههههههههههههههههههه
Post a Comment